冬天過後...春天來臨

任總都曾經講過呢句, 我都冬眠左差唔多一個月, 期間股票十分精彩

當上年年尾, 大家憧憬新一年股票回升, 樓市興旺之際, 港股灴月份每況越下!

港股走勢確實跑輸外圍, 古靈精怪, 甚至跑輸鄰鄰近地區, 大家嘗試去解釋呢個現象, 歸咎於"i kill you later", 人云亦云, 哈哈, 事情往往都係咁, 當大市跌落黎既感覺變大了! 大家似乎忘記, 8至10月升市時, 港股升幅完全跑贏其他股市, 升得多, 自然跌得多, 其實正常不過...股災既發生, 又無非係咁, 只係規模同時間既分別, 當然股災需要長時間復原, 日本同台灣, 用左19年時間, 都未去返以前既高位...

港股, 風高浪急, 單日有千點波幅, 己習以為常, 反而得幾百點, 則覺得悶到極. 最經典1.22黑色星期一一役, 適奉美股休市, 全球傳染著末日心態, 港股跌2000點! 終於俾我目睹單日跌2000點, 係8.17Deep-V日, 就想著會否有日跌2000點呢? 結果係經過1.22後, 就想著: 會否有日單日跌4000點?

1.22一役, 顯出Fed既老怕, 亦唔係死讀書派! 令人刮目相看! 一下子減75點子好未? 安撫了大眾情緒, 恒指反彈2300點!

自此之後恒指浮沉於250天線, 250天線都好似失去左一掂即彈既作用

冬眠其間, 內地雪災, 聽說損失慘重, 最同情一班春運旅客. 其間保險股捱沽, 所以入左1000股新聞多多既平安@55.8. 希望袋袋平安, 另外, 覆行之前策略, 中煤A股上市前一日放走中煤@18, 除此, 買入建行@5.67作中線之選, 其他股票則按兵不動.

股票前景仍然維持不變, 唔學得所謂投資大行(鱷)自刮嘴巴! 一時又話見底, 一見又大幅調低目標價! 司馬超之心乎? 而我則甚至認為現階段係買入良機:

1. 大好友四叔退下來做"股民", 真係好好笑

2. 1.22一役, 經歷了一次真正既恐慌拋售, 股票轉了手

3. 散戶無方向, 又未必夠膽買貨

4. 無乜成交, 市場未熱鬧起黎

呢種情況反而有d似上年3月份咁, 自己也要花點功夫, 捕捉到邊個版塊會展開升浪!

 補充資料

恒指收市報23759, 跌389, 成交781億

繼續尋底

港股走勢又再次高開後反跌, 就算美國升近200點都無補於是, 真係無計, 一副尋底格局. 其實呢幾日, 指數並唔係跌得多, 但好多股票, 日日都跌5%以上. 今日終於蠶食到我今年黎既利潤!

密切留意內房, 6行3保, 金屬, 有d跡象佢地跌定左, 但相反, 航運股今日都係跌得多, 可能之前其在升得太多吧. 而半新股係跌市中, 一如既往, 回得比較急, 歸咎於持貨者既問題吧, 連中鐵都跌好多, 又點唔少得佢既孖寶中材呢, 今日波司登都跌穿我既止蝕位, 就用沽出黎既錢支持下中材@8.6.

我就真係唔知幾時先係底部, 但中線仍看升既話, 根本唔需要在乎, 2年幾黎, 經過幾次調整, 係發揮經驗既時候呢..但可能最好既方法, 係睡一睡

補充資料

恒指收市報25838, 又倒跌630點, 成交增至1210億

重上鐵路

話口未完, 星期五港股又由頭跌到尾, 一個好差既走勢. 朝早見到中建材由31蚊, 跌返落29蚊, 意味住賺少左4000蚊. 恒指則由升400點變倒跌! 令我部署放走中建材, 而換馬. 當初為了短炒中建材, 而放走中鐵@11.62, 同中交建@23.05. 此消彼長下, 覺得後兩者將會有較大升幅, 所以下午一開市放走中建材@29.1, 只獲利3000左右, 而太心急之下, 買入中鐵@10.8同中交建@22.7, 早了15分鐘入貨, 就買貴左1000蚊, 但算吧, 中鐵同中交建, 係比較中線既投機. 講起我既中線選擇, 神華同財險今日逆市上升, 多得佢既, 今日我既組合都係保持著上升既勢頭

近日除左有idea想買醫藥股, 另外還有台灣概念股, 因為如果投機國民黨贏, 就應該買d因中台關係改善而有利既行業既股票,  我一下子聯想起厦門港. 可惜今日睇報紙有人貼呢隻股票, 好明顯遲左好多步! 加上台灣立委選舉已有結果, 如果我持有呢件股票, 星期一反而會係我放貨既機會呢. 無計, 唯有另尋機會.

港股己跌穿100天線, 令我更有入市衝動, 可惜我既彈藥已經用得八八九九. 我開始會追縱重傷既股票走勢, 分別係, 金屬股, 航運股, 金融股, 同內房股, 當確認升勢時先跟進. 另外今個星期都要調撥資金準備抽新股. 呢輪新股真係有佢地既價值呢, 因為對上2個月, 新股走勢之差, 迫使將會招股既公司未必咁進取呢...初步會抽新福港同茂業, 岩岩開正最近當旺既基建同百貨概念

 補充資料

恒指收市報26867, 又倒跌364點, 成交再增加至1287億

暫別阿里巴巴

雖然個人中線見好阿里巴巴, 但走勢實在唔太對辦了, 之前定下若果佢跌過25蚊就走人, 結果今日正正呢個價位放走左佢, 當然賺少好多, 日後唯有等機會先重新入貨.

今日黎左一個師奶式既超短炒, 話說尋日升勢波及到農業股, 決定今日買其中一隻追一追, 結果, 點指兵兵揀左中國綠色食品, 又用競價盤呢招, 未開市既買左@8.8. 近中午再睇一睇, 曾升到9.4, 但又見其他農業股無點郁, 唔對路情況下, 低位@9.1放左, 但都執返一個月lunch.錢...事後發現走勢並無唔妥, 但算啦, 不值得再睇多幾眼...

阿里巴巴套現出黎既錢, 買左2手國航@10.02. "東新戀"正式結束, 政策上, 中國航空業要整合既情況下, 無論東航董事點反對都好, 點會敵過中央政府? 金錢上, 國航"非常順利"獲批增發A股, 便有足夠既資金應付收購呢. 但今日國航仲係要跌, 拿拿森買返2手, 目標係中線!

另外, 多餘既錢, 繼續投放我既中線組合中, 今次加注神華@45.95. 佢既孖寶. 中煤宣佈發A股既時間表, 真係好呢, 同時代表左我放走佢既時間表, 就係佢A股上市前一日.

講起孖寶, IPO孖寶中鐵同中材終於彈返落黎, 尋日為左迎合中材而買既中建材輪到佢升啦, 中建材係我既短炒之選, 究竟我放左佢之後, 資金要投放邊度呢? 中鐵定係港鐵?

今日輪到炒汽車股, 將近我止蝕邊緣既重汽, 睇下會唔會正係彈到上去啦.  而聽日又輪到炒咩股呢?

 補充資料

恒指收市報27112, 倒跌67點, 成交增加再至1149億? 究竟係咩回事? 炒股定換馬?

當走錢莊換煤礦

近期我都認交易比較頻繁..無計, 之前入左既內房同內銀股走勢有D唔對路, 唯有蝕讓兼換馬

尋日內地銀行股, 唔知做咩事隻隻大成交下跌, 真係搞唔清邊個買邊個賣, 但隻隻走勢同內房般唔睇好, 佢地全部都跌破哂上次11.22四叔入市反彈既低位..總帶來唔安心感覺, 可能兩三個月內都未輪到呢D股行運呢, 適逢今日大市反彈, 就放走左剩低既招行@30.8, 只蝕1000, 隨即蓄一蓄煤礦股, 今次入左中煤@23.8, 暫時煤股都算夠貨, 可以掟埋一邊唔理啦

其他股方面, 持有一段時間既阜豐竟然榮登升幅磅首位? 今次終於等到機會放左佢, 投入資金極少, 但始終都賺返1000幾蚊返黎; 連阜豐都有份升, 開始有D感到食品股升勢近尾聲, 持有既統一今日走勢持繼對辦, 再升10%, $7係我短炒既目標, 而如果跌到返$6, 我都考慮會放, 始終入市個刻目標係為左短炒! 匯源果汁又唔見咩升勢, 再俾多幾日時間觀察, 同樣情況出現中交建, 係強勢的話, 應該無理由停下來!